Lis pou sezon siklòn

Prepare w yon sèl fwa

• Deside ki kote w ta ale si gen evakyasyon: kay yon zanmi ki rete pi lwen lanmè, yon otèl, yon abri. Ekri l.
• Pran foto chak chanm, deyò kay la, ak do kay la. Sere foto yo yon kote ki pa nan kay la.
• Li paj deklarasyon asirans ou (declarations page). Konnen franchiz siklòn ou (hurricane deductible) epi si w gen asirans inondasyon (pifò polis pa genyen l).
• Mete dokiman yo nan yon sak ki pa kite dlo antre: pyès idantite, asirans, papye kay oswa kontra lwaye, preskripsyon, yon lis medikaman ak dòz yo.
• Tcheke jeneratè a, pwotèj fenèt yo (shutters) oswa plywood la, tronsonnèz la. Achte sa ki manke pandan etajè yo toujou plen.
• Si yon moun nan kay la bezwen kouran pou aparèy medikal, oksijèn, oswa medikaman ki dwe rete nan frijidè, enskri l nan Rejis Bezwen Espesyal Florid (Florida Special Needs Registry).
• Bèt: chèche yon abri oswa yon otèl ki aksepte bèt kounye a. Mete papye vaksen yo ak yon kaj transpò nan twous la.

Gen yon tanpèt nan previzyon an

• Al chèche medikaman preskripsyon ou yo. Famasi yo fèmen bonè epi yo relouvri ta.
• Plen tank machin nan. Pran lajan kach; machin kat yo pa mache lè kouran an tonbe.
• Dlo: yon galon pou chak moun pou chak jou, pou sèt jou. Manje ki pa bezwen kuit pou sèt jou.
• Chaje tout bagay. Achte oswa chaje yon batri pòtatif pou telefòn.
• Si w ta evakye, konfime kote w prale a. Di yon moun ki andeyò eta a ki plan ou.
• Taye sa w kapab; mare oswa rantre nenpòt bagay van an ka leve.

Siveyans ak avètisman

• Monte pwotèj fenèt yo oswa kloure plywood la. Rantre tout sa ki deyò.
• Si yo bay lòd pou zòn ou evakye, ale. Pran sak dokiman yo, medikaman, chajè, bèt yo, ak rad pou sèt jou.
• Si w rete: mete dlo nan sache pou glase l pou frijidè a rete frèt pi lontan. Plen basen yo (tub) ak dlo pou rale twalèt, pa pou bwè.
• Mete frijidè a ak frizè a sou nivo ki pi frèt la.
• Konnen ki kote w ap pran abri andedan kay la: yon chanm nan mitan kay la ki pa gen fenèt, sou etaj ki pi ba a ki p ap inonde.

Rete kote w ye a

• Sispann kondui. Pon yo fèmen lè van fòs tanpèt twopikal soufle san rete.
• Chaje telefòn yo nèt; mete yo sou mòd ekonomi batri. Aktive alèt ijans san fil (wireless emergency alerts).
• Plen tank gaz machin nan si w poko fè l, epi pake l lwen pyebwa ak lwen kote ki konn inonde.
• Mete jeneratè a deyò, 20 pye lwen nenpòt fenèt oswa pòt, pa janm nan yon garaj. Pa janm.

Premye semèn nan

Pifò moun ki mouri akoz siklòn nan Florid mouri apre tanpèt la: monoksid kabòn, elektwokisyon, tronsonnèz, chalè, ak kondui nan dlo. Pran tan w.

• Jeneratè deyò sèlman, 20 pye lwen kay la. Monoksid kabòn pa gen odè.
• Konsidere chak fil kouran ki tonbe kòm si li gen kouran ladan l. Pa antre nan dlo ki kanpe toupre yo.
• Pran foto domaj yo anvan w netwaye. Apre sa, rele konpayi asirans ou; nimewo reklamasyon an se premye bagay ou bezwen.
• Pa siyen kontra ak okenn moun ki vin frape pòt ou. Mande konte w lis kontraktè ki gen lisans; denonse eskwokri bay eta a.
• Rele 211 pou èd ak manje, dlo, abri, ak rekiperasyon. Si gen yon gwoup rekiperasyon alontèm nan konte w, w ap jwenn li sou paj konte w la.
• Al wè kijan vwazen yo ye, sitou moun ki aje oswa ki poukont yo.

Pou enstriksyon ofisyèl, swiv biwo jesyon ijans konte w la ak Divizyon Jesyon Ijans Florid (Florida Division of Emergency Management). Gid sa a se konsèy jeneral ki soti nan òganizasyon manm Florida VOAD yo, epi li pa ranplase lòd lokal yo.

Gid premye semèn apre a bay plis detay.